Қарағанды Қазақстандағы ең лас қала ретінде танылды. Мұндай қорытындыны "Қазгидромет" мамандары жүргізген зерттеу нәтижесі көрсетті, - деп хабарлайды aqshamnews.kz тілшісі.
Желсіз күндері қаладағы ауа ластануының деңгейі рұқсат етілген шекті мөлшерден 24 есеге дейін асып кетуі мүмкін. Экологтардың пікірінше, ластанудың негізгі себептерінің бірі - жеке үйлердің сапасыз көмірмен пеш жағуы.
Жеке сектор тұрғыны Евгений Медведев кейінгі жылдары пештің түтіні әлдеқайда қоюланып кеткенін айтады. Оның бақылауынша, сапалы көмір табылса, түтін аз болады, алайда көбіне ашық әдіспен өндірілген көмір сатылып жатады. Мұндай көмір жылуды аз береді де, түтіні көп болады.
"Үш жыл бұрын 110 м² үйді бір маусым жылытуға шамамен 5 тонна көмір кететін. Ал қазір былтыр 10 тонна жұмсадым. Бұл нені білдіреді? Көмірдің сапасы нашарлаған", - дейді Медведев.
Тұрғындар қыста үй жылытуға 300 мың теңгеге дейін ақша шығарып, сонымен қатар, амалсыздан ауаны ластап отыр. Евгенийдің айтуынша, пеште қалатын күлдің көлемі де көбейген: бұрын бір шелек қана шықса, қазір үш шелекке дейін жиналады.
"Не істемедім дейсіз… Көмірді кептіріп көрдім, құрғақ кезде ертерек кіргізіп, тұндырып қойдым - бәрібір ештеңе өзгермеді", - дейді қала тұрғыны.
Экологтар жағдай жыл сайын ушыға береді деп санайды, өйткені бүгінгі күні халыққа көмір сату саласы реттелмеген, бақылаусыз нарықты еске салады.
"Көмір сапасын мемлекеттік бақылаудың жүйесі жоғалған. Көмір сатушылар көп жылдан бері көшірме күйінде жүрген “сертификаттарды” көрсетеді, оның қандай көмірге, қай жерде берілгені белгісіз. Ал нақты бақылау - орындарда тексеру, бақылау мақсатындағы сатып алу, зертханалық талдаулар - мүлде жүргізілмейді", - дейді Қарағандыдағы "ЭКОМУЗЕЙ" ұйымының даму жөніндегі директоры Дмитрий Калмыков.