Ғылым және жоғары білім министрі Саясат Нұрбек ҰБТ форматы мен мазмұны түбегейлі өзгеретінін мәлімдеді, деп хабарлайды Аqshamnews.kz тілшісі.
Министрдің айтуынша, Президент Қасым-Жомарт Тоқаевтың АҚШ-тағы сапары аясында ғылым мен жоғары білім саласына қатысты бірқатар маңызды келісімдер жасалды.
Саясат Нұрбектің сөзінше, Мемлекет басшысы әлемдегі ең көне ғылыми-зерттеу орталықтарының бірі саналатын Смитсон институтының басшыларымен кездесті. Келісім нәтижесінде "Болашақ" бағдарламасы арқылы қазақстандық ғалымдар, антропологтар, мәдениеттанушылар мен тарихшылар осы беделді институтта білім алып, тәжірибесін шыңдауға мүмкіндік алады.
Ал ҰБТ-ға қатысты үлкен өзгерістер күтіп тұр.
"Educational Testing Service (ETS) компаниясы – әлемдегі тестология саласындағы ең көне ұйым. Келіссөздер нәтижесінде ETS-тің жетекші мамандары қатысатын арнайы жұмыс тобы құрылады. Халықаралық деңгейдегі сарапшылардың тәжірибесі негізінде Қазақстандағы Ұлттық бірыңғай тестілеудің мазмұны мен әдістемесі терең жаңғыртылып, ол заманауи әдістеме мен бағалаудың сапасы жоғары халықаралық стандартқа сай жетілдірілмек", – деп атап өтті министр.
ске салайық, Нью-Йорктегі сапар барысында Президент Тоқаев ETS компаниясының президенті әрі бас атқарушы директоры Амит Севакпен де кездесті.