Қазақстанда тыйым салынған авторлардың жеке тізімі жүргізілмейді. Бұл туралы Ішкі істер министрлігі агенттіктің ресми сауалына берген жауабында мәлімдеді, деп хабарлайды aqshamnews.kz.
Министрліктің түсіндіруінше, есепке авторлар емес, сот шешімімен ел аумағында сақтауға, әкелуге, тасымалдауға және таратуға тыйым салынған материалдар ғана енгізіледі. Мұндай материалдардың тізімі ҚР Бас прокуратурасының Құқықтық статистика және арнайы есепке алу комитетінің ресми сайтында жарияланып отырады. Бұдан бөлек, мемлекеттік органдардың бірыңғай интернет-ресурстары арқылы діни сараптамадан оң қорытынды алған материалдар туралы ақпарат тоқсан сайын жаңартылады.
Діни әдебиетті тарату ережелері
“Діни қызмет және діни бірлестіктер туралы” заңның 9-бабына сәйкес, діни әдебиеттер мен материалдарды тек белгілі бір орындарда таратуға рұқсат етіледі:
• Құлшылық ғимараттарында (ғибадат үйлерінде);
• Діни білім беру мекемелерінде;
• Жергілікті атқарушы органдар арнайы белгілеген тұрақты үй-жайларда.
Діни әдебиетті елге әкелу кезінде (жеке қолдануға арналған бір данадан басқа) тек тіркелген діни бірлестіктерге және діни сараптаманың оң қорытындысын алғаннан кейін ғана рұқсат беріледі.
Діни сараптама қалай жүргізіледі?
Діни сараптаманы Қазақстанда Мәдениет және ақпарат министрлігінің Дін істері комитеті жүзеге асырады. Сараптама тағайындаудың негізгі себептері:
• Жеке немесе заңды тұлғалардың өтініштері;
• Діни әдебиеттің кітапхана қорларына түсуі;
• Миссионер ретінде тіркелу және діни бірлестіктерді тіркеу кезінде;
• Діни мазмұндағы материалдарды елге әкелу жағдайында;
• Қызметтік бұйрық негізінде;
• Діни мазмұндағы материалдарды шығару, дайындау немесе тарату кезінде.
Сараптама нәтижелері Дін істері комитетінің ресми сайтында жарияланады.
Заң бұзғандарға қандай жаза қарастырылған?
Діни материалдарды сараптамасыз әзірлеп немесе таратқан жағдайда ҚР Әкімшілік құқық бұзушылық туралы кодексінің 490-бабы 1-бөлігі 3) тармақшасына сәйкес жауапкершілік көзделген:
• Жеке тұлғалар үшін — ескерту немесе 25 АЕК көлемінде айыппұл;
• Заңды тұлғалар үшін — 100 АЕК көлемінде айыппұл салынады.
Бұған дейін Мәдениет және ақпарат министрлігінің Дін істері комитеті Қазақстандағы медреселердің қызметін реттеу тәртібіне де түсініктеме берген болатын.