2025 жылдың 1 қаңтары мен 1 наурызы аралығында шетелде демалу үшін 178 мыңнан астам қазақстандық шекара асқан, деп хабарлайды aqshamnews.kz.
Әрине, шетелде демалушылар қатарының артып жатқанын байқаған алаяқтар бірден осы жақтан ақша табудың жолын іздеді. Осыған байланысты шетелде демалушы ретінде баратын болсаңыз турагенттіктермен келісу кезінде аса мұқият болуды ескертеді Туризм және спорт министрлігі.
«Туристік Қамқор» жүйесінің әкімшілігі шетелге шығу туризміндегі азаматтардың құқықтарын қорғау саласындағы заңнаманы еске салды. Атап айтқанда, Қазақстан Республикасының Туристік қызмет туралы заңына сәйкес, туристік пакет жасау құқығы тек лицензиясы бар, туроператорлық қызметті жүзеге асыратын және жүйеге кепілдік беруші ұйымдардың мүшесі болып табылатын туроператорларға беріледі.
«Туристік пакет туристке туроператор тарапынан сатылуы тиіс. Ал туристерді сату, кеңес беру және жүргізу қызметтері тек туристік агенттіктерге жүктелген. Бұл дегеніміз, туристік агенттік өздігінен туристік пакет жасаумен айналыса алмайды», – делінген хабарламада.
Министрлік азаматтарды мұқият болуға және тек ресми туроператорлар мен туристік агенттіктердің қызметтеріне сенуге шақырады.