Қазақстанда есірткіге қарсы күрес аясында соңғы төрт айда шамамен 3,5 тонна есірткі заты тәркіленді. Бұл туралы Aqshamnews.kz сайты хабарлайды.
Қазақстан Республикасы Ішкі істер министрлігінің (ІІМ) мәліметінше, төрт ай ішінде ел аумағында үш мыңға жуық есірткі құқық бұзушылығы тіркелген. Оның ішінде 828 есірткі сату фактісі анықталды. Заңсыз айналымнан тәркіленген есірткілердің жалпы салмағы шамамен 3,5 тоннаны құрайды, оның ішінде:
-
259 кг синтетикалық есірткі;
-
екі тоннаға жуық марихуана;
-
303 кг гашиш.
Сонымен қатар, құқық қорғау органдары алты тоннаға жуық прекурсорды тәркілеп, 83 есірткі зертханасын жойды.
ІІМ Есірткі қылмысына қарсы іс-қимыл комитеті төрағасының міндетін атқарушы Данияр Мейірханның айтуынша, есірткі қылмысына қатысы бар 20 ұйымдасқан қылмыстық топтың жолы кесілген. Құқық қорғаушылар 1783 адамды ұстады, оның ішінде 669 адам қамауға алынды.
Есірткі таратуда интернеттің белсенді қолданылуы да назарда. ІІМ мәліметінше, заңсыз контенті бар 11 мыңнан астам сайт бұғатталды. Сонымен қатар, 1 млрд теңгеден астам сомаға 12 мың банк картасы мен шот тоқтатылды. Бұл шаралар онлайн есірткі саудасының жолын кесу мақсатында жүргізілді.
ІІМ өкілдері есірткі қылмысына қарсы күресті күшейтуге ниетті. Данияр Мейірханның айтуынша, елде есірткіні өндіру және таратуға қарсы ауқымды операциялар әлі де жалғасын табады. Құқық қорғау органдары есірткімен байланысты қылмыстардың алдын алу, заңсыз айналымды жою және халықтың қауіпсіздігін қамтамасыз ету мақсатында белсенді жұмыс жүргізуде.