Өткен жылдың алғашқы үш тоқсанында Қазақстанда сабын, тазалау, жуу, парфюмерия және косметикалық құралдар өндірісі 17,3 миллиард теңгені құраған. Бұл көрсеткіш 2022 жылдың сәйкес кезеңімен салыстырғанда 0,9%-ға өскен, деп хабарлайды aqshamnews.kz.
Костанай облысы тазалау және косметикалық құралдарды ең көп өндірген өңір болып табылады, мұндағы өндіріс көлемі 4,7 миллиард теңгеге жетіп, жылдық өсім 18,3%-ды құраған. Алдыңғы бес өңірге Астана (3 миллиард теңге), Шымкент (2,7 миллиард теңге), Алматы (2,6 миллиард теңге) және Алматы облысы (1,2 миллиард теңге) кіреді.
Қазақстандық өндірушілердің отандық нарықты қамтамасыз ету деңгейі көңіл көншітпейді. Мәселен, еліміздегі тіс пасталары нарығы толығымен импортқа тәуелді. 2023 жылдың қаңтар-тамыз айларында Қазақстанға 4 мың тонна тіс пастасы мен порошоктар әкелінсе, отандық өндіріс – нөл. Орталық гигиена құралдарының жалпы көлемі 4,6 мың тонна сырттан келсе, елімізде тек 17 тонна өндірілген. Демек, бұл сұраныстың 0,4%-ы ғана қамтамасыз етілді дегенді білдіреді.
Тұрмыстық тазалау пасталары мен порошоктар бойынша отандық компаниялардың үлесі бар болғаны 0,01 пайызды құрайды. Ал шампуньдер мен шаш лактары – 2,7%, парфюмерия мен косметика – 7,2%, жуу құралдары – 9,4% қамтамасыз ете алады. Тек сабын өндірісінде сұраныс 29,5%-ға, ал шаш алуға арналған құралдар, дезодоранттар және басқа да тауарлар бойынша 40,5%-ға жабылды. Жалпы, қазіргі жағдай бойынша бұл жағынан көштің артына қалып келе жатқанымызды жасыра алмаймыз.
Сонымен жоғарыдағы қорытындыларға қарап, Қазақстан тазалау және косметикалық құралдар өндірісі әлі де кенжелеп, сыртқа қол жайып отырғанымыз ащы да болса шындық. Ал біз толығымен өз өнімімізді пайдаланатын елге айналу үшін өндірушілерге нақты шаралар мен стратегиялар қажет.
Естеріңізге сала кетейік, бұған дейін еліміздегі етпен қамтамасыз мәселесі төңірегінде жазған болатынбыз.