Еңбек және халықты әлеуметтік қорғау министрінің орынбасары Асқар Биахметов тағы бір мереке бекітілуі мүмкін екенін айтты, - деп хабарлайды Аqshamnews.kz тілшісі.
Бұл туралы ол Үкімет отырысынан кейінгі брифингте бөлісті.
Бұған дейін премьер-министрдің орынбасары Ермек Көшербаев Үкіметке азаматтар мен кәсіби қауымдастықтардан белгілі бір күндерді мемлекеттік немесе кәсіби мерекелер деп тану туралы өтініш көп түсетінін айтқан еді. Осыған байланысты БАҚ өкілдері еңбек министрлігі өкілінен ресми түрде Энергетик күні бекітілуі мүмкін бе екенін сұрады.
"Бүгінде Энергетик күні бойынша мәселе бұйрықты бекітуге келіп тіреліп тұр. Жоба Әділет министрлігінде. Егер жақын арада келіссек, күнін – 22 желтоқсан деп бекітеміз", – деді вице-министр.
Сондай-ақ, брифинг кезінде 31 желтоқсанды демалыс күні ретінде жариялау жөнінде сұрақ қойылды. Асқар Биахметов Үкіметте мұндай мәселе қаралып жатпағанын айтты.