Қазақстанда жануарларды циркте қолдануға тыйым салу және зоопарктерді кезең-кезеңімен жануарларға арналған паналау орындарына немесе санктуарийлерге айналдыру туралы онлайн-петиция пайда болды, - деп хабарлайды Aqshamnews.kz.
Петиция авторларының айтуынша, мұндай мекемелер көңіл көтеру құралы емес, жануарларды қорғау және оңалту орталықтарына айналуы тиіс.
«Жануарларды үйрету мен оларды циркте ойнатуға толық тыйым салуды, жаңа зоопарктердің құрылысын тоқтату туралы мораторий енгізуді, 3–5 жыл ішінде жануарларды арнайы отандық және халықаралық приюттарға тапсыруды, сонымен қатар цирк пен зоопарк қызметкерлерін қайта даярлауға қолдау көрсетуді сұраймыз», — делінген петиция мәтінінде.
Инициаторлар әлемдік тәжірибеге сүйенеді: Еуропаның көптеген елдерінде жабайы жануарлардың циркте өнер көрсетуі әлдеқашан тыйым салынған, ал дәстүрлі зоопарктерді біртіндеп гуманистік үлгідегі мекемелер алмастырып жатыр.
Қоғам белсенділері жануарлардың еркіндігін шектейтін және оларды табиғи мекенінен ажырататын ойын-сауық индустриясына қоғам тарапынан қайта баға берілетін уақыт жетті деп есептейді.