28 ақпан – Халықаралық сирек кездесетін аурулар күніне орай Қазақстан Республикасы Денсаулық сақтау министрлігі маңызды мәліметтерді жариялады, деп хабарлайды Aqshamnews.kz тілшісі. Соңғы жылдары орфандық дерттерді емдеуге бөлінетін қаржы көлемі 23 есеге өсіп, рекордтық деңгейге жеткен.
Ведомствоның дерегінше, сирек кездесетін ауруларға шалдыққан азаматтарды дәрі-дәрмекпен қамту мемлекет назарындағы басым бағыттардың бірі.
– 2019 жылы бұл мақсатқа 7,5 млрд теңге бөлінсе,
– 2025 жылы қаржыландыру көлемі 175,4 млрд теңгеге дейін артқан.
Жалпы соманың 60 пайызы республикалық бюджет есебінен өтеледі. Қалған бөлігі жергілікті бюджеттер мен «Қазақстан халқына» қоғамдық қорының қолдауымен қаржыландырылады.
Қазір ел бойынша сирек диагнозы бар 73 мыңға жуық науқас тіркелген. Оның шамамен 14 мыңы – балалар. Мамандардың айтуынша, мұндай дертке шалдыққандар жалпы пациенттердің 3 пайызынан аспайды. Соған қарамастан, амбулаториялық дәрі-дәрмек шығындарының жартысына жуығы осы санаттағы науқастарға жұмсалады.
Сонымен қатар, халықаралық талаптарға сай орфандық аурулардың тізімі алғаш рет жаңартылды.
Жаңа орфандық препараттарды іріктеу үш кезең бойынша жүргізіледі. Бағалау барысында клиникалық тиімділігі, қауіпсіздігі және фармако-экономикалық негізділігі ескеріледі.