Елде жаңа бап күшіне енгеннен кейін екі ай ішінде жеті іс қозғалды
Қазақстанда "Мәжбүрлеп неке қию" туралы Қылмыстық кодекстің жаңа бабы күшіне енгеннен бері 15 адам ұсталды, - деп хабарлайды aqshamnews.kz.
2025 жылдың 16 қыркүйегінен бастап Қылмыстық кодекске 125-1-бап - 1Мәжбүрлеп неке қию1 енгізілген. Бұл бап адамның еркіне қарсы оны некеге тұруға немесе бірге тұруға мәжбүрлеу, сондай-ақ сол мақсатта адамды ұрлау әрекеттері үшін жауапкершілікті көздейді.
Ішкі істер министрлігінің мәліметінше, аталған бап күшіне енгеннен бері полиция жеті қылмыстық іс тіркеген. Мұндай құқықбұзушылықтар Қарағанды, Маңғыстау, Жамбыл, Түркістан облыстарында және Шымкент қаласында анықталған.
"Жүргізілген іс-шаралар барысында 15 адам ұсталды. Әр іс бойынша сотқа дейінгі тергеу амалдары жүріп жатыр, барлық мән-жайлар анықталуда", – деп хабарлады ІІМ.
Полиция азаматтарды қалыңдықты алып қашу немесе мәжбүрлеп некеге тұрғызу фактілері туралы дереу хабарлауға шақырды.
Ведомство өкілдерінің айтуынша, мұндай қылмыс үшін жеті жылға дейін бас бостандығынан айыру, ал ауырлататын жағдайларда он жылға дейін жаза қарастырылған.