Қазақстанда 24 наурыздан бастап мобильді құрылғылардың IMEI-кодтарын тексерудің жаңа ережелері енгізіледі.
Бұл шара заңсыз әкелінген немесе ұрланған телефондарды анықтап, олардың ұялы желіге қосылуын шектеуге бағытталған, деп хабарлайды aqshamnews.kz.
IMEI-кодтар үш санатқа бөлінеді:
1. Ақ тізім: Заңды түрде сатып алынған және тіркелген құрылғылар. Бұл телефондар ешқандай шектеусіз жұмыс істейді.
2. Сұр тізім: IMEI-коды күмәнді немесе қайталанатын құрылғылар. Мұндай телефондардың иелеріне 30 күн ішінде сатып алудың заңдылығын дәлелдеу мүмкіндігі беріледі.
3. Қара тізім: Ұрланған немесе қолдан жасалған смартфондар. Бұл құрылғылар Қазақстанда ұялы желіні пайдалана алмайды.
Егер смартфоныңыз заңды түрде сатып алынған болса, алаңдаудың қажеті жоқ. Дегенмен, құрылғыңыздың IMEI-кодының мәртебесін тексеру ұсынылады. Бұл үшін Мемлекеттік радиожиілік қызметінің ресми сайтындағы арнайы сервисті пайдалана аласыз.
IMEI-кодыңызды тексеру үшін:
1. Телефоныңызда *#06# теріңіз – экранда IMEI-код пайда болады.
2. Аталған кодты жоғарыда көрсетілген сайттағы тексеру өрісіне енгізіңіз.
Егер IMEI-кодыңыз “сұр тізімде” болса, 30 күн ішінде құрылғының заңдылығын дәлелдеу үшін қажетті шараларды қабылдауыңыз қажет. Бұл туралы толығырақ ақпаратты Мемлекеттік радиожиілік қызметінің сайтынан ала аласыз.
Егер сіз пайдаланылған ұялы телефонды сатып алуды жоспарласаңыз, құрылғының ұрланғандар тізімінде жоқтығын тексеру маңызды. Бұл үшін жоғарыда аталған сайттағы арнайы сервисті пайдалана аласыз.
Осы шаралар Қазақстанда заңсыз әкелінген және ұрланған телефондардың санын азайтуға, сондай-ақ ұялы байланыс қызметтерінің сапасын арттыруға бағытталған.