Мәжіліс депутаты Никита Шаталов Қазақстандағы интернет-алаяқтықтың көбеюін онлайн-кредиттердің қолжетімділігімен байланыстырып отыр. Ол Парламентте сөйлеген сөзінде онлайн-кредиттерге тыйым салуды талап еткен онлайн-петицияны атап өтті.
Алайда, Қаржы нарығын реттеу және дамыту агенттігінің төрайымы Мәдина Әбілқасымова онлайн-кредит беруге тыйым салуға қарсы екенін айтты. Оның пікірінше, бұл шешім банктік қосымшалардың мүмкіндіктерін шектейді.
«Бізге онлайн-кредит беруге тыйым салу туралы ұсыныс келіп түсті. Алайда қазіргі таңда барлық қаржылық және банктік қызметтер цифрландырылған, оларды онлайн арқылы көрсету кеңінен қолданылады. Бұл көптеген қазақстандықтардың мүдделеріне әсер етеді. Сондықтан, азаматтардың онлайн қызметтерге қолжетімділігін шектемеу үшін, онлайн-кредиттерге тікелей тыйым салу әзірге орынсыз деп санаймыз. Оның орнына, онлайн-алаяқтықпен күресудің басқа механизмдерін қарастыруды ұсынамыз», — деді Әбілқасымова.
Ол тыйым салу орнына, кредит беру өтініштерін тексеру мерзімін ұзартуды ұсынды. Ұлттық банк те онлайн-кредиттерге тыйым салудың тиімді болмайтынын қолдады.