Мәдениет және спорт министрлігі мемлекеттік мұрағаттар үшін ғимараттардың жетіспеушілігі мәселесін қозғады
Еліміз бойынша 229 мемлекеттік мұрағат жұмыс істейді, деп хабарлайды Almaty-akshamy.kz
«Бұл ретте мемлекеттік мұрағаттардың типтік мамандандырылған ғимараттарының жетіспеушілігі байқалады, олардың үлесі тек 14,7%-ды құрайды», - деді ҚР Мәдениет және спорт министрі Дәурен Абаев ведомствоның кеңейтілген отырысында.
Министрдің айтуынша, жүргізілген талдау республика бойынша 128 нысан салу қажеттігін анықтады.
Ол жетекшілік ететін вице-министрге жергілікті атқарушы органдармен бірлесіп мұрағат қоймаларының көлемін ұлғайту мәселесін пысықтауды тапсырды.
«Сонымен қатар, негізгі сервер істен шыққан жағдайда «Е-мұрағатты» резервтік серверлермен қамтамасыз ету мәселесін бақылауға алу қажет. Сондай-ақ мемлекеттік органдардың ұлттық және өңірлік мұрағаттармен өзара іс-қимыл проблемасы бар. Жүйелерді біріктіру ресми түрде жүзеге асырылды, бірақ іс жүзінде ол толық жұмыс істемейді. Бұл - ұлттық қауіпсіздік мәселесі. Мен оны жеке бақылауымда ұстаймын», - деді Дәурен Абаев.