Оқу-ағарту министрі Жұлдыз Сүлейменова мұғалімдерді аттестаттау жүйесіне енгізілген негізгі өзгерістерді түсіндірді, – деп хабарлайды aqshamnews.kz тілшісі.
Министрдің айтуынша, енді педагогикалық қызметте жүрген мұғалімдер пәндік біліктілік тестін тапсырмайды. Бұл шешім уақытша емес, толық күшіне енген өзгеріс екені айтылды.
Жұлдыз Сүлейменованың сөзінше, пәндік біліктілік тесті тек педагог мамандығына алғаш рет қадам басқан жоғары оқу орны түлектері үшін сақталады. Сондай-ақ жас мамандар екі жылдан кейін педагог-модератор санатына өту кезінде де осы тесті тапсырады. Ал қазір мектепте жұмыс істеп жүрген мұғалімдер аттестаттау барысында мұндай тесттен босатылады.
Министр педагогтер арасында жиі талқыланған портфолио мәселесіне де тоқталды. Оның айтуынша, енді қағаз түрінде құжат жинап, қол қойдырудың қажеті болмайды. Портфолио толықтай электронды форматқа көшіріледі. Бұл бағыттағы нақты тетік алдағы уақытта қосымша хабарланбақ.
Сонымен қатар, мұғалімдер үшін авторлық бағдарлама жазу талабы да тоқтатылады. Министр бұл мәселенің педагогтермен ұзақ талқыланғанын айтып, енді мұндай бағдарлама әзірлеудің қажеті жоқ екенін мәлімдеді.
Осылайша, жаңа өзгерістер мұғалімдердің аттестаттау процесін жеңілдетіп, артық жүктемені азайтуға бағытталып отыр.