Мәжіліс депутаттары Сенат енгізген түзетулермен келісіп, жасанды интеллект (ЖИ) туралы заң мен оған қатысты бірқатар заңдарға өзгерістер енгізуді қолдады, деп хабарлайды Аqshamnews.kz.
Заңға қандай өзгерістер енгізілді?
Өткен аптада Сенат бұл заң жобасын Мәжіліске кері қайтарып, бірқатар толықтыруларды талап еткен болатын. Атап айтқанда:
-
Жасанды интеллект жүйелерін пайдаланудан келетін зиян үшін міндетті сақтандыру енгізіледі. Бұған дейін сақтандыру ерікті түрде ғана қарастырылған еді;
-
ЖИ жүйелерінің иелері тәуекел байқалған жағдайда тек залалды азайтуға емес, оны алдын алуға және мүмкін болатын қауіптердің алдын толықтай жоюға міндеттеледі.
Мәжіліс түзетулерді мақұлдады
Бүгінгі пленарлық отырыста Мәжілістің Экономикалық реформа және өңірлік даму комитеті Сенаттың ұсыныстарымен келісті. Депутаттар дауыс беріп, заң түпкілікті қабылданды. Енді құжат Мемлекет басшысының қол қоюына жіберіледі.
Халықаралық тәжірибе
Қазіргі уақытта әлемнің бірқатар елдері жасанды интеллектті заңнамалық тұрғыда реттеуге кіріскен:
-
Еуропалық одақ – жоғары тәуекелді жүйелерге қатаң талаптар мен айыппұлдарды көздейтін кешенді заң қабылдаған алғашқы өңірлердің бірі. Ол кезең-кезеңімен биыл және келесі жылы күшіне енеді;
-
Оңтүстік Корея – рамалық заң қабылдады;
-
Қытай, АҚШ, Ұлыбритания және БАӘ – жасанды интеллект саласын реттейтін жеке нормативтік актілер қолданыста;
-
Жапония, Бразилия және Үндістан – заң жобалары әзірлену үстінде.
Жаңа заң Қазақстанда жасанды интеллектті дамытуға құқықтық негіз қалыптастырып қана қоймай, оны қауіпсіз әрі жауапты пайдалануға бағытталған.