Қазақстан төлқұжатында қар барысының бейнесі пайда болады. Бұл туралы Үкімет отырысында айтылды, - деп хабарлайды Аqshamnews.kz тілшісі.
Ішкі істер министрінің міндетін атқарушы Бауыржан Әленов ведомство ұлттық төлқұжаттың қорғаныс деңгейін арттыру бағытында жұмыс жүргізіп жатқанын айтты.
Сурет: ІІМ презентациясынан алынған скрин
"Біздің азаматтар визасыз 43 елге бара алады. Төлқұжат барлық халықаралық стандартқа сай, қажетті қорғаныс элементтерінің бәрі бар. Қазір қосымша қорғаныс деңгейлерін енгізу мәселесін қарастырып жатырмыз", – деді Әленов.
Қазақстандық төлқұжаттың жаңа нұсқасы қандай болатыны көрсетілді. Суретте мемлекеттік символдар, спорт клубтары мен ұйымдарда жиі бейнеленетін барысты көруге болады.
Паспортқа өтініш беру кұны қандай?
Төлқұжат бет санына байланысты төленетін құны да әртүрлі:
2025 жылғы 1 қаңтардан бастап 1 АЕК — 3 932 теңге екенін атап өтейік:
- Паспорт (36 бет) — 31 456 теңге (8 АЕК).
- Паспорт (48 бет) — 47 184 теңге (12 АЕК).
- Балалар паспорты — 15 728 (4 АЕК). Айта кетейік, баланың төлқұжаты 24 беттен тұрады.