Бүгін, 2024 жылы Қазақстанда IT-сала қызметкерлері өздерінің кәсіби мерекелерін атап өтуде, деп хабарлайды aqshamnews.kz.
Қазіргі заманғы IT-технологиялар елімізде барлық салада кеңінен қолданылып, қоғамдық өмірдің ажырамас бөлігіне айналды. Қазақстанның IT саласындағы жетістіктері халықаралық деңгейде жоғары бағаланып отыр. Мысалы, БҰҰ электрондық үкіметінің әлемдік рейтингінде Қазақстан 24-орынды иеленсе, онлайн-қызметтер индексі (OSI) бойынша 10-орынға тұрақтаған.
2023 жылы Қазақстанда онлайн режимде 50 миллионнан астам мемлекеттік қызмет көрсетілген, оның 92%-ы тұрғындар үшін үйден шықпай-ақ қолжетімді болды. Сонымен қатар, egov мобильді қосымшасын ай сайын шамамен 4,6 миллион адам пайдаланады.
Бұл нәтижелер – отандық IT мамандарының ерен еңбегінің нәтижесі. Олардың арқасында біз қашықтықтан байланыс орнатып, білім алып, мемлекеттік қызметтерге онлайн қол жеткізе аламыз. Сонымен қатар, көптеген процестерді автоматтандыру еліміздің дамуына жаңа мүмкіндіктер туғызып, экономика мен қоғамның тиімділігін арттыруда.
Қазақстанның IT саласы болашақта да осы жетістіктерді одан әрі арттырып, әлемдік аренада жаңа белестерге жетуді мақсат етеді.