Қазақстанда ең төменгі жалақы мөлшері өсуі мүмкін. Бұл туралы бүгін Мәжілісте ұсынылды, - деп хабарлайды aqshamnews.kz тілшісі.
2025 жылы елімізде ең төменгі жалақы мөлшері - 85 000 теңге.
Бүгін Мәжілісте 2026–2028 жылдарға арналған республикалық бюджет туралы заң жобасы қаралып жатыр. Құжатқа берілген қорытындыда депутаттар ең төменгі жалақыны өсіруді ұсынғаны айтылған.
"Халықаралық Еңбек Ұйымының ұсыныстары негізінде әзірленген ең төменгі жалақыны анықтаудың жаңа әдістемесінің қабылдануына байланысты, Мәжілістің әлеуметтік‑мәдени даму комитеті ең төменгі жалақы мөлшерін 85 000 теңгеден 110 000 теңгеге өсіруді қажет деп есептейді", - делінген құжатта.
Ең төменгі жалақы - бұл заңмен белгіленген ең аз жалақы мөлшері, толық еңбек айы үшін жұмыс беруші осыдан төмен төлем төлемеуге тиіс. Бұл көрсеткіш жұмысшыларды мемлекеттік кепілдік арқылы қорғауға және еңбек ақыны реттеу, сондай‑ақ, түрлі әлеуметтік төлемдерді есептеу үшін қолданылады.