Сонымен қатар нәресте және перинаталдық өлім көрсеткіштері де төмендеді, – деп хабарлайды aqshamnews.kz тілшісі ДСМ баспасөз қызметінің мәліметіне сілтеме жасап.
Бұл туралы денсаулық сақтау министрі Ақмарал Әлназарова Астанада өткен Орталық Азиядағы әйелдер мен жастар денсаулығына климаттық және экологиялық қауіптердің әсеріне арналған халықаралық сессияда мәлімдеді.
Министрдің айтуынша, сондай-ақ ана мен бала денсаулығының негізгі көрсеткіштерін жақсартуға қол жеткізілді. Сонымен қатар нәресте және перинаталдық өлім көрсеткіштері де төмендеді. Климаттың өзгеруі халық денсаулығына әсер ететін маңызды факторлардың біріне айналған.
"Климаттық қауіптер адам денсаулығына, демографиялық үдерістерге және денсаулық сақтау жүйесінің тұрақтылығына әсер ететін жүйелі факторға айналып отыр", – деп атап өтті Әлназарова.
Оның мәліметінше, температураның көтерілуі мен экологиялық факторлар инфекциялық және жүрек-қантамыр ауруларының қаупін арттырып, әйелдердің репродуктивтік денсаулығына кері әсер етуі мүмкін.
Елімізде жүкті әйелдерді ерте бақылауға алу, әйелдер денсаулығын нығайтуға бағытталған "Аналар саулығы" бағдарламасы іске асырылып жатыр. Сондай-ақ медициналық-санитариялық алғашқы көмек деңгейінде және облыстық перинаталдық орталықтарда әйелдер консультацияларының қызметі қайта жанданды. Жүкті әйелдердің 90%-дан астамы 12 аптаға дейін есепке алынады.