Satbayev University-дің қауымдастырылған профессоры Инеш Кенжина атом энергетикасының бүгінде дамыған елдердің энергетикалық құрылымының маңызды бөлігі екенін айтады.
Әлемнің 12 елінде АЭС-терден өндірілетін электр энергиясының үлесі 30%-дан асса, Францияда бұл көрсеткіш 72%-ды құрайды. Қазіргі заманауи АЭС-тер ел экономикасының индустриалдық дамуы үшін базалық қуаттың сенімді көзі болып табылады.
– Қазақстанда атом электр станциясын салу – елдің энергетика саласын әртараптандырудың перспективті бағыты. Бұл энергия генерациялау көздерінің құрылымын тұрақтырақ етеді және еліміздің энергия ресурстарын ұтымды пайдалануға мүмкіндік береді, – деп атап өтті Инеш Кенжина.
АЭС табиғи ресурстарды тиімді пайдалануға мүмкіндік береді
Қазақстан уран қоры бойынша әлемдегі ең бай елдердің бірі болып табылады, ал «Қазатомөнеркәсіп» ҰАК АҚ табиғи уранның әлемдегі ең ірі өндірушісі және көптеген мемлекеттерге уран жеткізіп, әлемдік атом энергетикасының 40%-дан астам қажеттілігін қамтамасыз етеді. Осыған байланысты Satbayev University қауымдастырылған профессоры Инеш Кенжина елімізде атом энергетикасын дамыту қажеттілігін атап өтті.
– Бұл электр энергиясын өндіру үшін өзіміздің табиғи ресурстарды тиімді пайдалануға, көмірсутектер мен басқа да энергия ресурстарының импортына тәуелділікті азайтуға мүмкіндік береді, бұл елдің энергетикалық қауіпсіздігінің маңызды элементі болып табылады. Сонымен қатар, Қазақстан өз аймақтық энергетикалық қауіпсіздігін нығайтып, көршілес елдерге электр энергиясын экспорттау әлеуетін арттыра алады. АЭС мұнай мен газбен шектелмей, энергия ресурстарының экспортын әртараптандырудың маңызды элементі бола алады, – деп атап өтті сарапшы.