Қазақстанда АЭС салуды қолдау жөніндегі Халықтық штабтың aes2024.kz ресми сайты іске қосылды
«AMANAT» партиясының «TALQYLAU» диалог алаңының отырысында АЭС салуды қолдау жөніндегі Халықтық штабтың ресми сайты – aes2024.kz таныстырылды. Бұл сайт алдағы референдум мен Қазақстандағы атом энергетикасының даму перспективалары туралы толық ақпарат ұсынады.
Сайтта әлемдегі атом энергетикасының тарихы, АЭС саны, халықаралық тәжірибелер, қауіпсіздік стандарттары мен жаңа буын реакторлары жайлы мәліметтер бар. Штабтың медиа тобының жетекшісі Бақтияр Мәкен сайттың халықты ақпараттандырудағы рөлін атап өтіп, ресурстың қолжетімді және ыңғайлы екенін айтты.
Сайт үш негізгі айдарды қамтиды: «Жаңалықтар», «Атом энергетикасы туралы» және «АЭС салу бойынша». Басты бетте референдумның күні мен өтетін орны көрсетілген. Сондай-ақ, пайдаланушыларға АЭС салудың әлемдік тәжірибесі мен жиі қойылатын сұрақтар бойынша ақпарат ұсынылған.
Мамандар, соның ішінде «Қазақстандық атом электр станциялары» ЖШС бас директоры Тимур Жантикин және Ядролық технологиялар қауіпсіздігі орталығының директоры Александр Клепиков өз пікірлерімен бөлісетін болады.