БҰҰ қазақстандық балалардың тамақтануында қандай мәселелер бар екенін айтты, деп хабарлайды aqshamnews.kz
Балалық шақтағы дұрыс тамақтанбау денсаулыққа ұзақ мерзімді әсер етеді. Қазақстандағы жағдай қаншалықты күрделі екені және қандай шаралар қабылданып жатқаны туралы БҰҰ Балалар қорының (ЮНИСЕФ) денсаулық сақтау және тамақтану бағдарламаларының үйлестірушісі Бауыржан Жүсіпов айтып берді.
Noks.kz дерегінше, ЮНИСЕФ-тің қолдауымен Ұлттық статистика бюросы жүргізген зерттеу 20 мың отбасыны қамтыған. Оның нәтижесіне сәйкес, елде 5 пен 9 жас аралығындағы балалардың 23%-ы артық салмаққа ие.
Сонымен қатар 6%-ы семіздікке шалдыққан. Бұл, әсіресе, ұл балалар арасында жиі кездеседі. Жағдайды өзгерту мақсатында 1 қыркүйектен бастап Қазақстанда мектептер мен денсаулық сақтау мекемелерінде жаңа тамақтану стандарты енгізіледі. ЮНИСЕФ бұл стандартты тиісті министрліктермен бірлесе отырып әзірлеген.
Елімізде шамамен 1,7 миллион бала тегін ыстық тамақпен қамтылған. Енді жаңа стандарттарға сай бұл тағамдар дәрумендер мен микроэлементтерге бай болуы тиіс.
Бұл ереже балалардың толыққанды дамуына қажет тұрақты және салауатты әдеттерді қалыптастыруға бағытталған.