Жөндеу жұмыстары кешенді бағдарлама шеңберінде жүргізіліп жатыр.
Жол жөндеу жұмыстарымен шұғылданатын қазақстандық мамандар жыл басынан бері жасаған жұмысы жайында айтты, деп хабарлайды Almaty-akshamy.kz.
«Жөндеу жұмыстары жол қауіпсіздігін қамтамасыз ету және жол төсемін одан әрмен бұзылудан сақтау мақсатындағы кешенді бағдарлама шеңберінде жүргізілуде», - делінген Индустрия және инфрақұрылымдық даму министрлігінің баспасөз қызметінің хабарламасында.
Автокөлік жолының тегістігі жайлылықты сақтау үшін ғана емес, сондай-ақ жол қозғалысы кезіндегі қауіпсіздікті қамтамасыз етуде де өте маңызды. Жолдағы қозғалыс жиілігінің артуына байланысты жол төсемдерінде түрлі ақаулар пайда болуда. Өз кезегінде ой-шұңқырларды тез арада жөндеу қажет екендігі белгілі. Бүгінде жол жамылғысын қалпына келтірудің ең көп тараған түрі әрі тиімді әдісі – шұңқырларды тегістеу.
Биылғы жылы «Қазавтожол» ЖШС республикалық маңызы бар жолдардағы 257 992 шаршы метр шұңқырды жөндеген. Бұдан бөлек, 92,8 мың шаршы метр түрлі ақаулар қалпына келтіріліп, 672 мың шаршы метр аумақтағы жарықшақтарды бітеу жұмыстары жүргізілген.