Геологиялық барлаудағы ЖИ технологиялары: Қазақстанда 2,5 млн геологиялық ақпарат цифрлық форматқа ауыстырылды, деп хабарлайды aqshamnews.kz
Үкімет отырысында геологиялық саланы дамыту мәселесі қаралып, Премьер-министр Олжас Бектенов геологиялық барлауға инвестициялар тарту және саланың болашағын талдауға мүмкіндік беретін цифрлық технологияларды енгізудің маңыздылығын атап өтті.
Өнеркәсіп және құрылыс министрі Қанат Шарлапаев бастапқы геологиялық ақпаратты цифрландыру жұмыстарының барысын баяндады. Бүгінгі таңда 2,5 млн дерек цифрлық форматқа ауыстырылды. Бұл жұмыс жасанды интеллект (ЖИ) технологияларын қолдану арқылы жетілдіріледі. 2024 жылдың соңына дейін тағы 1,5 млн деректі цифрландыру жоспарланған. Жалпы процесс 2026 жылдың соңына дейін аяқталады деп күтілуде.
Зерттелген жер қойнауының ауданы 2 млн м²-ге дейін ұлғайтылды. Шығыс Қазақстанда минералдық ресурстардың перспективалы кен орындарын шетелдік геологиялық қызметтермен бірлесіп іздестіру жұмыстары жүргізілуде.
Көмірсутек шикізаты саласында күрделі кен орындарын барлауға инвестициялар тарту үшін Жақсартылған модельдік келісімшарт тетігі енгізілді. 12 учаскеде іздестіру жұмыстары аяқталуға жақын. Әсіресе литийге деген сұраныс жоғары. Литий іздестіру Баянкөл өңірінде және Арал–Каспий аумағында жүргізіліп жатыр.
Биыл шамамен 1 млн шаршы шақырым аумақта пайдалы қатты қазбаларды барлау алаңдары ашылды. Бұл Riotinto, Fortescue, Arras Minerals сияқты ірі халықаралық компанияларды тартуға мүмкіндік берді.
Дегенмен, қатты пайдалы қазбалар мен көмірсутек қорларын кеңейту бойынша іздестіру жұмыстарының белсенділігі төмен екені атап өтілді.
«Қолда бар жұмыс тәсілдерін өзгерту керек. Минералдық-шикізат базасын тиімді пайдаланып, жаңа кен орындарын игеру бойынша нақты мемлекеттік саясат әзірлеу қажет. Пайдалы қазбалардың сапалық құрамы төмендеп барады. Бұл салаға инвестиция тарту үшін жеңілдіктер қарастыру керек», — деді Премьер-министр7