Осы мақсатта арнайы заң әзірлеген.
Қазақстан Үкіметі ауыл шаурашылығын дамыту үшін жеке қосалқы шаруашылықтарға жағдай жасалу керектігін айтады. Осы мақсатта әзірлеген заң жобасы Парламентке жіберілді, деп хабарлайды Almaty-akshamy.kz.
«Мемлекет басшысының тапсырмасы аясында Ауыл шаруашылығы министрлігі әзірлеген «Жеке қосалқы шаруашылық туралы» заң жобасы жан-жақты қоғамдық талқылаудан кейін Қазақстан Республикасы Парламенті Мәжілісінің қарауына жіберілді, - делінген АШМ баспасөз қызметінің хабарламасында.
Мамандардың айтуынша, заң жобасының кейбір сәттері мен нормалары қоғам арасында көптеген сұрақтар туғызды, бірақ жеке қосалқы шаруашылықтар қызметінің заңнамалық негіздерінің қажеттілігі айқын көрінді.
Ресми дерек бойынша, Қазақстанда шамамен 1,6 млн ЖҚШ бар, олар 2020 жылдың қорытындысы бойынша 2,6 трлн теңге ауыл шаруашылығы өнімін өндірді немесе 41,5%. Бұл ретте қызметтің бұл түрі жеке заңнамалық актімен реттелмеген, олардың мәртебесі анықталмаған.
Заң жобасы мүдделі органдармен бірге қаралып, сондай-ақ үкіметтік емес ұйымдармен, фермерлермен, бизнес қоғамдастықпен, белсенді азаматтармен және тікелей ауылдық елді мекендердің тұрғындарымен жария талқылаудың барлық кезеңдерінен өтті. Нәтижесінде 1600-ден астам ұсыныстар мен ескертулер келіп түсті.
Аталған жұмыстың қорытындысы бойынша заң жобасы келіп түскен пікірлер мен ұсыныстарды ескере отырып, бірнеше рет пысықталды.
«Заңның қорытынды жобасы айтарлықтай нақтыланып, жеке қосалқы шаруашылыққа нақты түсінік берілді және оның мәртебесі кәсіпкерлік емес қызмет түрі ретінде анықталды. Жергілікті атқарушы органдарға жеке қосалқы шаруашылықтарды дамыту үшін жағдай жасау бөлігінде нақты қосымша өкілеттіктер берілген, ең алдымен бұл жайылымдық және шабындық алқаптармен қамтамасыз ету мәселелеріне қатысты. Жеке қосалқы шаруашылықтарды дамыту мәселелері бойынша жауапкершілік күшейтілді, осы мәселе бойынша ауыл тұрғындары алдында әкімдердің есеп беру нормасы енгізілді»,- делінген АШМ баспасөз қызметінің хабарламасында.
Аталған заңды қабылдау жеке қосалқы шаруашылықтарға олардың кооперативтері арқылы жүргізілетін мемлекеттік қолдау шараларын көрсетудің заңнамалық негізін қалауға мүмкіндік береді. Мұндағы басты мәселе кооперативтердің өз мүшелеріне көрсететін қызметтерінің құнын субсидиялау болып табылады.