Бакуде Түркі мемлекеттері ұйымының (ТМҰ) отбасы және әлеуметтік саясат мәселелеріне жауапты министрлері мен мекеме басшыларының екінші отырысы аяқталды.
Жиынға Қазақстан, Әзербайжан, Мажарстан, Қырғызстан, Тәжікстан, Түрікменстан және Түркия өкілдері қатысты, деп хабарлайды aqshamnews.kz.
Биылғы жиынның тақырыбы – «Қазіргі қоғамдағы әйелдердің рөлі: тұрақты даму және дәстүрлі құндылықтар».
Халықаралық кездесудің мақсаты – түркі халықтары арасында әйелдер мен отбасына қатысты саясат саласында ортақ құндылықтар бойынша ынтымақтастықты нығайту және тереңдету.
ҚР Мәдениет және ақпарат министрлігінің Жастар және отбасы істері комитетінің төрағасы Қайрат Қамбаров Қазақстанның гендерлік және отбасылық саясатының негізгі бағыттарымен таныстырды. Ол Мемлекет басшысы Қасым-Жомарт Тоқаев бұл мәселелерге айрықша көңіл бөлетінін атап өтіп, елде гендерлік теңдік орнатып, отбасы институтын нығайту үшін қажетті заңнамалық және институционалдық негіздер жасалғанын айтты.
Отырыс барысында басқа елдердің өкілдері де өз тәжірибелерімен бөлісті. Сонымен қатар, делегаттар алғашқы отырыс Декларациясының орындалу барысын, бірлескен жобалар мен оқыту бағдарламаларын талқылады. Сондай-ақ, әйелдердің әлеуметтік-экономикалық рөлін арттыру, дәстүрлі құндылықтарды сақтау, отбасыларды цифрландырумен байланысты жаһандық қауіп-қатерлерден қорғау мәселелері де күн тәртібінде болды.
Кездесу қорытындысы бойынша, ТМҰ аясындағы отбасы және әлеуметтік саясат мәселелеріне жауапты министрлер мен мекеме басшыларының үшінші отырысын 2026 жылы Қазақстанда өткізу туралы шешім қабылданды.