"Самұрық-Қазына" қоры басқармасының төрағасы Нұрлан Жақыпов теміржолшылар ұжымына ұлттық компанияның жаңа жетекшісін таныстырды. "Қазақстан темір жолы" ұлттық компаниясы басқарма төрағасы болып Талғат Алдыбергенов тағайындалды, - деп хабарлайды aqshamnews.kz.
Бұған дейін ол осы компанияда төраға орынбасары қызметін атқарған.
Жаңа басшы туралы не белгілі?
Талғат Алдыбергенов – теміржол саласында 35 жылдан астам еңбек өтілі бар тәжірибелі маман. Алматы теміржол инженерлері институтын үздік бітірген. Сонымен қатар, Ресей Президенті жанындағы халық шаруашылығы және мемлекеттік қызмет академиясында экономика магистрі және экономика ғылымдарының кандидаты ғылыми дәрежесін алған.
Ол еңбек жолын қарапайым жұмысшы ретінде бастап, түрлі басшылық қызметтерді атқарған. 1990-жылдардан бастап Батыс Қазақстан темір жолында түрлі қызметтерде болған. Кейін "ҚТЖ" құрамындағы Ақтөбе филиалын басқарды, сондай-ақ көлік логистикасы мен тасымалдау саласына қатысты бірқатар ұйымдарды басқарған.
2008–2019 жылдары бірнеше ірі компаниялардың, оның ішінде "Кедентранссервис" пен "Kazakhmys Maker" серіктестіктерінің басшысы болды. Ал 2024 жылдан бері "Қазақстан темір жолы" ұлттық компаниясы басқарма төрағасының орынбасары лауазымын атқарып келген.