Әлемнің 40-қа жуық елінің 60 журналисінің жұмысын қарастырды.
Қазақстан астанасында «Қазақстан шетелдік БАҚ көзімен» атты халықаралық байқау жеңімпаздарын марапатталды, деп хабарлайды Almaty-akshamy.kz.
Cыртқы істер министрлігі және Қазақстан бас редакторлар клубының ұйымдастырған байқау осымен алтыншы рет өткізіліп отыр және биылғы конкурс Қазақстан Республикасы Тәуелсіздігінің 30 жылдығына арналды.
«Байқау аясында қазылар алқасы әлемнің 40-қа жуық елінің 60 журналисінің жұмысын қарастырды. Материалдар Қазақстанға қатысты экономика, саясат, халықаралық қатынастар, тарих, мәдениет, туризм, денсаулық сақтау, спорт, ядролық қарусыздану, жаңартылмалы энергия көздері сияқты кең ауқымды тақырыптарға, сондай-ақ қазақ халқының көрнекті тұлғалары – Абай Құнанбайұлы мен Әбу Насыр әл-Фарабидің мұрасына арналды»,– делінген СІМ баспасөз қызметінің хабарламасында.
Байқауға қатысушылардың материалдары шетелдік газеттерде, журналдарда, интернет-басылымдарда және танымал интернет платформаларында жарияланды.
Қазылар алқасының шешімімен 6 шетелдік журналист жеңімпаз болып танылды. Олар – «Республика», «Литвалық курьер» апталық басылымдардың және «Эхо Литва» газетінің бас редакторы Н.Жуков (Литва), «Finančné Noviny» басылымының бас редакторы В.Бачишин (Словакия), Пәкістанның жаһандық және стратегиялық зерттеулер орталығының аймақтық сарапшысы доктор М.ул-Хасан Хан (Пәкістан), Канаданың эмиграция және мультикультурализм мәселелері жөніндегі бұрынғы министрі Т.Рупрехт (Канада), «BCI Медиа» компаниясының коммерциялық продюсері И.Черней-Келнер (Канада), және «MNB» телеарнасының тілшісі Ц.Бат-Эрдэнэ (Монғолия).
Марапаттау рәсіміне Қазақстан Республикасы Сыртқы істер министрінің орынбасары Ерлан Әлімбаев, Қазақстан бас редакторлары клубының президенті Бибігүл Жексенбай, Нұр-Сұлтан қаласында аккредиттелген шетелдік дипломатиялық корпустың және жетекші қазақстандық БАҚ өкілдері қатысты.
