Әлеуметтік желілерде тараған ақпаратқа қатысты полиция түсініктеме берді.
Қарағанды облысы ПД баспасөз қызметі «Қазақстан» шахтасындағы өрт қасақана болуы мүмкін деген ақпаратты жоққа шығарды, деп хабарлайды Almaty-akshamy.kz
Полицейлер атап өткендей, барлық қажетті тергеу шаралары жүргізілуде, өрттің шығу себебін анықтайтын тиісті сараптамалар тағайындалды.
«Облыс тұрғындарын қауесет пен арандатушылықтарға берілмеуді, тек ресми ақпаратқа сенуді сұраймыз. Жалған ақпарат таратқаны үшін Қазақстан Республикасы Қылмыстық кодексінің 274-бабына сәйкес қылмыстық жауапкершілікке тартылу қаупі бар», - делінген хабарламада.
17 тамыз күні Қарағанды облысындағы «Қазақстан» шахтасында өрт шыққан еді. Апат кезінде шахтада 227 қызметкер болған. Апатты жою жоспарын дереу енгізу арқылы 222 адам шығарылды. Өкінішке қарай, жер астында қалып қойған 5 кенші қаза тапты.
Президент Қасым-Жомарт Тоқаев өрт себебін анықтау үшін жан-жақты тергеу жүргізуді тапсырды.