Қазақстан-қырғыз шекарасында «Қарасу» және «Айша бибі» өткізу пункттерінде темекіні заңсыз алып өтушілердің әрекеттері анықталды, деп хабарлайды aqshamnews.kz.
Мұндай контрабандалық тауар алып өту әрекеттерін 26 қыркүйекте мемлекеттік кірістер органдары мен ҰҚК Шекара қызметінің қызметкерлері ұстады.
Әдеттегідей жұмыс күнінде «Қарасу» өткізу пунктіне болгар бұрышын тасымалдаушы рефрежераторы бар жүк көлігі келеді. Алайда тексеру жүргізгенде көлікке жасырылған темекі табылады. Осылайша «Oris», «Parlament», «Zumerret» маркалы жарияланбаған 180 мыңнан астам қорап темекі табылған.
Дәл сол күні, «Айша бибі» өткізу пунктінде бұршақ артқан көліктен жарияланбаған 15 мың қорап «Oris» темекісі анықталды.
Барлық темекі өнімдерінде акцизделетін өнім үшін көзделген сәйкестендіру құралдары жоқ. Іс жүргізу шешімін қабылдау үшін барлық материалдар Жамбыл облысы бойынша Экономикалық тергеу департаментіне тапсырылатын болады.