2024 жылдың 27 қыркүйегінде Қазақстанның Қорғаныс министрлігі мерзімді әскери қызметті жою туралы мәселе бойынша мәлімдеме жасады.
Министрлік өкілдерінің айтуынша, ҚР Конституциясының 36-бабына сәйкес, "Қазақстан Республикасын қорғау – әрбір азаматтың қасиетті парызы және міндеті". Қорғаныс министрлігі мерзімді әскери қызметті жою мемлекеттің жалпы қауіпсіздігіне қатер төндіріп, сыртқы қауіп-қатерлерге қарсы тұру мүмкіндігін төмендетіп, елімізде бейбітшілік пен тұрақтылықты қамтамасыз ете алмайды деп ескертеді, деп хабарлайды aqshamnews.kz.
Әкімшілік процестік-процедуралық кодекстің 90-1-бабына сәйкес, петициялардың тақырыбына қорғаныс мәселелері енгізілмейді. Бұл бастама мемлекеттің қорғаныс қабілетіне нұқсан келтіруі мүмкін екенін атап өтті.
Қорғаныс министрлігінің мәлімдемесіне сәйкес, Қазақстанда басымдық келісімшарт негізіндегі қызметке беріліп, 70%-дық үлес соларға, ал 30%-дық үлес мерзімді қызметке бөлінеді.
"Еліміздің жауынгерлік әлеуеті негізінен келісімшарт негізінде қызмет ететін әскери қызметкерлер арқылы қамтамасыз етіледі. Дегенмен, қалған 30%-ды мерзімді қызметтегі сарбаздар құрайды. Мерзімді қызметтегі сарбаздар өз қызмет кезеңінде әскери дайындықтың негізгі дағдыларын меңгеріп, жауынгерлік жағдайда әрекет етуді, ату, әскери техниканы жүргізуді үйренеді, сондай-ақ физикалық және моральдық жағынан шыңдалады. Қызметін аяқтағаннан кейін олар әскери дайындықтан өткен резерв ретінде есепте тұрады және мерзімді түрде қайта даярлау курстарынан өтіп, біліктілігін арттырып отырады", – делінген Қорғаныс министрлігінің баспасөз хабарламасында.