Елдегі қайырымдылық ұйымдарының саны 20%-ға артқан.
The World Giving Index қайырымдылық индексінің 2022 жылғы деректеріне сәйкес, қайырымдылық рейтингінде Қазақстан 119 елдің арасында 54-орыннан 40-орынға көтерілді, деп хабарлайды Almaty-akshamy.kz Inbusiness.kz cілтеме жасап.
Аталған көрсеткіш зерттелетін елдердегі қала тұрғындарының сауалнамалары нәтижелеріне негізделіп, адамдардың ақшалай түрде қайырымдылық жасауын, қайырымдылық білдіруге ниет білдірген халықтың үлесін ескереді.
Қайырымдылыққа ел халқынан бөлек, квазимемлекеттік секторды қоса алғанда ірі компаниялар да қатысады.
ҚР Ақпарат және қоғамдық даму вице-министрі Данияр Қадыровтың хабарлауынша, соңғы екі жылда елдегі қайырымдылық ұйымдарының саны 20%-ға артып, 1 мыңнан асқан. Ірі қайырымдылық қорларының әлеуметтік жұмысының ауқымы үлкен. Соңғы жылдары қайырымдылықтың басым бағыттарына жетімдерге (54,31%) және ауыр сырқаттары бар балаларға (48,8%) көмек көрсету жатады.