Бүгін, 2026 жылғы 15 наурызда өткен республикалық референдумда қабылданған Қазақстан Республикасының жаңа Конституциясы күшіне енді.
Осы тарихи оқиғамен барша қазақстандықтарды шын жүректен құттықтаймыз!
Жаңа Конституция ауқымды сараптамалық және қоғамдық жұмыстың нәтижесінде қабылданды. Тәуелсіз Қазақстан тарихында алғаш рет Конституция деңгейінде қазақ мемлекеттілігінің тарихи сабақтастығы бекітілді. Бұл ұлттық мемлекеттік-құқықтық дәстүрдің үздіксіздігін айқындап, азаматтық бірегейліктің негізін нығайтады.
Жаңа Конституция заң үстемдігі қағидатын орнықтырып, заңдылық пен құқықтық тәртіпті қамтамасыз етудің құқықтық тетігін күшейтті.
Әділетті Қазақстан қағидаттарына конституциялық мәртебе берілді. Адам құқығы мен бостандығын қорғау кепілдігі едәуір кеңейтіліп, Конституцияда азаматтардың цифрлық құқығы мен ұсталған сәттен бастап заң көмегін алу құқығы бекітілді.
Конституция саяси көзқарасына, әлеуметтік жағдайына, ұлтына және өзге де айырмашылығына қарамастан, Қазақстан Республикасының барлық азаматтарына ортақ құқықтық кепілдікті нығайтады. Қоғам бірлігі, заңға құрмет және мемлекет пен азаматтың өзара жауапкершілігі еліміздің орнықты дамуының бұлжымас негізі ретінде айқындалды.
Қазақстан Халық партиясы мемлекеттік органдарды, саяси партияларды, азаматтық қоғам институттарын және барша азаматтарды жаңа Конституцияның ережелерін дәйекті түрде жүзеге асыруға, құқықтық мемлекетті нығайту жолында әрбір азаматтың және Қазақстанның келешек ұрпағының игілігі үшін бірлесіп еңбек етуге шақырады.