Ирина Юнусметова Париж Олимпиадасының лицензиясына қол жеткізді
Халықаралық нысана көздеу федерациясы (ISSF) бүгінгі күні барлық Әлем Кубогы кезеңдерінен кейін жаңартылған Олимпиадалық рейтингін жариялады. Осы рейтинг нәтижесінде Ирина Юнусметова Париж Олимпиадасының лицензиясына ие болды.
Ұлттық құрама спортшысы 10 метрден тапаншамен нысана көздеу санатында қайта үлестіру кезеңінде жолдамаға иелік етті. Бұл Қазақстанның спорттық ату федерациясы үшін үлкен жетістік, себебі бұл 9-шы Олимпиадалық лицензия.
Бұған дейін Ислам Сатпаев, Константин Малиновский, Александра Ле, Арина Алтухова, Никита Чирюкин (нысана көздеу); Әсем Орынбай, Эдуард Ещенко және Мария Дмитриенко (стенд ату) Парижге баратын лицензияға ие болған еді. Осы қатарда Әсем Орынбай мен Ирина Юнусметованың лицензиясы жеке спортшының өзіне тиесілі болса, қалғандары федерацияның квотасы болып табылады.
Жалпы алғанда, Қазақстанның еншісіндегі Олимпиадалық лицензия саны 67-ге жетті.