Қазақстан армиясы түрік өндірісіндегі Bayraktar ұшқышсыз ұшу аппараттарын (ҰҰА) алуды жоспарлап қана қоймай, оларды ел аумағында өндіруді де қолға алмақ, деп хабарлайды aqshamnews.kz ҚР Қорғаныс министрлігіне сілтеме.
Қорғаныс министрі Руслан Жақсылықов пен Baykar Defence компаниясының бас директоры Халук Байрактардың арасындағы келіссөздер Стамбулда өткен Saha Expo – 2024 көрмесі аясында өтті.
«Тараптар Қазақстан аумағында тактикалық ұшқышсыз ұшу жүйелері мен барраждық оқ-дәрілерді жергілікті деңгейде өндіру бойынша жол картасын әзірлеу туралы келісімге келді», — деп хабарлады министрлік.
Көрмеде қазақстандық делегацияға Bayraktar AKICI, Bayraktar TB3, Bayraktar TB2, Bayraktar Kalkan ұшқышсыз ұшу аппараттары мен Mosquito-X барраждық оқ-дәрілері таныстырылды.
Келіссөздердің қорытындысы бойынша ҚР Қорғаныс министрлігі мен Baykar компаниясы арасындағы жұмыс кездесуінің хаттамасына қол қойылды. Түрік тарапы Bayraktar Kalkan, Bayraktar Mini ұшқышсыз аппараттары мен Mosquito-X барраждық оқ-дәрілерін қазақстандық әскери сынақтар үшін тегін беруге ниетті екенін растады.
Сонымен қатар, Қорғаныс министрлігі өз тарапынан да ұшқышсыз жүйелер бойынша әзірлемелердің жүргізіліп жатқанын атап өтті. Алматыдағы мамандар қазіргі уақытта әскерде сыналып жатқан дронға қарсы қаруларды жасап шығарған.