Бұл туралы ҚР Сыртқы істер министрлігінің ресми өкілі Айбек Смадияров мәлім етті
«Ауғанстан билігінің қыз балаларды 6-сыныптан кейін мектепте оқуға және әйелдерге мемлекеттік мекемелер мен халықаралық ұйымдарда жұмыс істеуіне уақытша тыйым салғаны туралы ақпаратты үлкен алаңдаушылықпен қабылдадық. Әйелдердің құқығын қорғау мен гендерлік теңдікті ілгерілету мәселесі әрдайым Үкіметтің назарында. Бұл мәселе біздің елдің БҰҰ Адам құқықтары жөніндегі кеңесіне мүшелігімізде 2022-2024 жылғы басымдықтарының бірі болып саналады», - деді Айбек Смадияров министрліктің апталық брифингінде.
Оның айтуынша, еліміз Ауғанстанды қалпына келтіру үшін қаржылық, техникалық және гуманитарлық көмекті жүзеге асыру бойынша өңірлік және халықаралық бастамалар шеңберінде әртүрлі бағдарламаларға белсенді қатысып отырады.
Атап айтқанда, 2017 жылы Қазақстан Ауғанстандағы әйел азаматшалар үшін оқыту бағдарламасын жүзеге асыру туралы бастама көтерген болатын. Бұл Еуропалық одақтың қолдауын тауып, 2022 жылға дейін іске асырылып келді.
«Әзірге бұл бастама тоқтап тұр. Ауғанстан үкіметінің келісімі болған жағдайда біз бұл бағдарламаны жалғастыруға дайынбыз. Бұл мәселені талқылап отырамыз, енді ауған тарапының жауабын күтеміз», - деді Айбек Смадияров.