Global Firepower ұйымы 2025 жылға арналған әскери қуат рейтингінің жаңартылған нұсқасын ұсынды. Бұл тізімде Қазақстан өзінің позициясын нығайтып, 57-орынға көтерілді. Ал 2024 жылы әлемдік армиялар рейтингінде 58-орында болған еді.
Орталық Азия көршілерінің ішінде Қазақстанға ең жақын орналасқан Өзбекстан 58-орында. Басқа елдердің нәтижелері келесідей: Түрікменстан – 77-орын, Қырғызстан – 105-орын, Тәжікстан – 108-орын.
Жекелеген көрсеткіштер бойынша да Қазақстан айтарлықтай нәтижелерге жетті:
- Реактивті залптық от жүйелерінің саны бойынша 17-орын (407 бірлік).
- Өзі жүретін артиллерия саны бойынша 21-орын.
Рейтингтің бірінші орнында бұрынғыдай АҚШ тұр, екінші орында – Ресей, үшіншіде – Қытай. Тізімнің алғашқы бестігіне Үндістан мен Оңтүстік Корея кірген. Ал ең соңғы орында Бутан орналасқан.
Global Firepower рейтингі бірнеше жылдан бері жарияланып келеді. Зерттеушілер әлемнің 145 елінің армияларын 50-ден астам параметр бойынша сараптайды. Оған армия мен басқа да әскери құрылымдардың саны, олардың қаржыландырылуы, елдердің географиялық жағдайы кіреді. Дегенмен, негізгі назар әскери әлеуетке аударылады: қару-жарақтың түрлері, әскер саны, резервистер және т.б.
2023 жылы Қазақстан армиясы рейтингте бірден бес орынға көтеріліп, 63-орыннан 58-орынға шыққан еді. Экономист және қоғам қайраткері Айдар Әлібаевтың айтуынша, Қазақстан армиясының Global Firepower тізімінде жоғарылауы елдің әскери әлеуетін арттыруға бағытталған жұмыстардың нәтижесі.