Бүгін 86 жасқа қараған шағында танымал актриса Рымкеш Омарханова өмірден озды, - деп жазады aqshamnews.kz тілшісі.
Өнер иесі - қазақ театр өнерінің мақтанышы, Қазақстанның еңбек сіңірген қайраткері, "Құрмет" орденінің иегері, Қалибек Қуанышбаев атындағы Қазақ ұлттық музыкалық драма театрының негізін қалаушылардың бірі.
Қаралы хабар Қалибек Қуанышбаев атындағы Қазақ ұлттық музыкалық драма театрының ресми парақшасында жарияланды.
"Рымкеш Омарханқызының өмірден өтуіне байланысты марқұмның туған-туыстары мен жақындарына қайғырып көңіл айтамыз. Рымкеш Омарханқызы - жарты ғасырдан астам уақытын ұлттық сахна өнерінің дамуына арнаған, 150-ден аса рөлді сомдап, қазақ театрының алтын қорын байытқан дара актриса. Ол Қарағанды қаласындағы Сәкен Сейфуллин атындағы театрда шыңдалып, кейін елордадағы Қалибек Қуанышбаев атындағы Қазақ ұлттық музыкалық драма театрының ашылуына зор үлес қосты", - делінген ақпаратта.
Актриса еңбек жолында Мақпал (Ғ. Мүсірепов "Қозы Көрпеш - Баян Сұлу"), Төлегеннің анасы ("Қыз Жібек"), Мөржан (М. Әуезов "Қарагөз"), Еңлік ("Еңлік-Кебек"), Таңқыбике ("Түнгі сарын"), Толғанай (Ш. Айтматов "Ана-Жер-Ана"), Катерина (А. Островский "Найзағай"), Джульетта (У. Шекспир "Ромео мен Джульетта"), Биғайша (Т. Ахтанов "Күшік күйеу"), Ганна (А. Дударев "Кеш") сияқты рөлдерді сомдаған.