2016-2022 жылдар аралығында "Қазақфильм" киностудиясына кино шығару және прокаттау мақсатында бөлінген 14,5 млрд теңгенің тек 4,8%-ы ғана ақталған. Бұл туралы сенатор Бекболат Орынбеков мәлімдеді, деп хабарлайды аlmaty-akshamy.kz.
Мәдениет және ақпарат министрлігі 165 млрд теңге бюджетімен бірнеше рет түзетулер енгізгеніне қарамастан, шамамен 2 млрд теңгені игермеген. Сенатордың айтуынша, қаражатты пайдаланудың тиімсіздігі көптеген жылдар бойы отандық кинематография саласында да байқалады. Мысалы, "Әруақ" кинофильміне 300 млн теңге жұмсалғанымен, табысы небары 7 мың теңгені құраған. Ал "Композитор" киносына 1,2 млрд теңге бағытталғанымен, оның табысы 400 мың теңгеден аспаған.
Ұлттық киноны мемлекеттік қолдау орталығының мәліметтеріне сәйкес, 2019-2023 жылдары бюджеті 6,7 млрд теңгені құрағанымен, прокаттан түскен кіріс бар болғаны 1,1 млрд теңге болған.
Тағы бір бюджетті тиімсіз жұмсаған министрлік – Экология және табиғи ресурстар министрлігі. Оның 11,4 млрд теңге көлеміндегі шығындары сегіз рет түзетілгеніне қарамастан, тиімсіздік 7,7 млрд теңгені құраған.
Жалпы есепті жылы бюджет қаражатының 73,3 млрд теңгесі игерілмей қалған.
Бұл келтірілген мәліметтер мемлекеттік қаражаттың дұрыс пайдаланылуының маңыздылығын көрсетеді. Қаражаттың тиімсіз жұмсалуы қоғам дамуына кері әсерін тигізетінін ұмытпауымыз қажет.