Мемлекет басшысы Қасым-Жомарт Тоқаев Ұлттық құрылтай отырысында өткен реформа мен жаңғырту үдерістеріне тоқталып, маңызды өзгерістер мен жетістіктерді атап өтті, деп хабарлайды aqshamnews.kz
«Осыдан үш жыл бұрын наурыз айында арнайы Жолдау жарияладым, оны білесіздер. Елімізді түбегейлі жаңғырту үшін ауқымды реформа жасайтынымызды айттым. Сол кезде алғаш рет Ұлттық құрылтай туралы бастама көтердім», – деді Президент.
Мемлекет басшысы үш жыл ішінде Қазақстанның жаңа тұрпатты елге айналғанын айтты. Ол саяси реформалардың елдегі жан-жақты өзгерістерге мүмкіндік бергенін атап өтті. Жолдаудың аясында жалпыұлттық референдум арқылы Ата заңға түзетулер енгізілгені, Парламенттің құзыреті кеңейіп, Үкіметтің жауапкершілігі артқаны айтылды.
Сонымен қатар, Адам құқықтарын қорғау жүйесінің жақсарғаны, Конституциялық соттың құрылғаны және азаматтардың шешім қабылдау үдерісіне белсене қатысуына мүмкіндік туғаны да сөз болды.
Президенттің айтуынша, осы және басқа да маңызды реформалар елімізді жаңғырту және оның дамуы үшін зор маңызға ие.