Бурабайда өтіп жатқан Ұлттық құрылтайда Мемлекет басшысы Қасым-Жомарт Тоқаев салық реформасына қатысты өз пікірін білдірді, деп хабарлайды aqshamnews.kz
«Енді бірқатар мәселеге арнайы тоқталып өткім келеді. Ең алдымен қоғамда қызу талқыланып жатқан салық реформасына қатысты пікірімді айтайын. Салық жүйесі — бұл бүкіл мемлекеттік жүйенің тірегі. Бюджетте қаржы болмаса, мемлекет өз міндетін толық атқара алмайды, әлеуметтік міндеттемелер де орындалмайды», – деді Президент.
Қасым-Жомарт Тоқаев салық жүйесі мәселесін талқылаған кезде, белгілі экономист Жақсыбек Құлекеевтің айтқан пікірін мысалға келтірді. Сонымен қатар, Құрылтай мүшелері Қайырбек Арыстанбеков, Марат Башимов, Ерлан Саиров, Расул Рысмамбетов және Мұрат Әбенов салық-бюджет мәселесіне қатысты орынды пікір білдіргенін атап өтті.
«Еліміз үшін аса қажет шаралардың мән-маңызын халыққа егжей-тегжейлі түсіндіру керек. Жұрттың бәрі экономист немесе қаржыгер емес. Мемлекеттің қандай шараны не үшін қолға алып жатқанын бәрі бірдей түсіне бермеуі мүмкін. Сондықтан реформаның мәнін адамға түсінікті тілмен жеткізу керек», – деп қорытындылады Мемлекет басшысы.
Президенттің айтуынша, салық реформасының мәні мен мақсатын халыққа дұрыс түсіндіру, түсініспеушіліктердің алдын алу үшін маңызды.