Мемлекет басшысы Қасым-Жомарт Тоқаев Үкіметтің кеңейтілген отырысында өткен жылғы экономикалық көрсеткіштерге тоқталып, 2024 жылға арналған негізгі міндеттерді айқындады. Президенттің айтуынша, 2023 жыл күрделі болғанымен, ел экономикасы жағымды көрсеткіштермен аяқталған.
– «Былтыр біраз қиындық болғаны рас. Экономиканың дамуына көптеген жағымсыз факторлар ықпал етті. Дегенмен, біз ахуалды ушықтырмай, бақылауда ұстай алдық. Жалпы нәтиже жаман емес деуге болады. Бірақ жайбарақат отыруға болмайды, шешімін табуы қажет түйткілдер әлі де көп. Мұны сарапшылар да, азаматтар да жақсы біледі», – деді Президент.
Сонымен қатар, Қасым-Жомарт Тоқаев Қазақстан экономикасын әртараптандыру міндеті тиісті деңгейде орындалмағанын атап өтті.
– «Экономикамыз Ұлттық қордың қаржысына аса тәуелді болып тұр. Бірақ, осы жерде атап өтуіміз керек, Ұлттық қор – бұл мемлекеттік экономиканың ажырамас бөлігі. Бизнестің инвестициялық белсенділігі әлі де төмен деңгейде. Бұл олқылықтарды биылдан қалдырмай дереу жою қажет. Үкімет нақты шаралар қабылдауы тиіс», – деді Мемлекет басшысы.
Президент экономиканы тұрақтандыру және инвестициялық белсенділікті арттыру бағытында Үкіметке нақты тапсырмалар берді. Алдағы уақытта осы саладағы түйткілді мәселелер шешімін табу үшін шұғыл шаралар қабылданатыны белгілі болды.