Бурабайда өтіп жатқан Ұлттық құрылтайда Мемлекет басшысы Қасым-Жомарт Тоқаев әйелдер колониясындағы жағдайға байланысты өз пікірін білдіріп, бұл мәселені қайта қарауды ұсынды, деп хабарлайды aqshamnews.kz
«Тағы бір маңызды мәселе. Маған белгілі адвокат Айман Омарова хат жолдады. Ол өз хатында күрделі тақырыпты қозғап, әйелдер колониясындағы ахуалға тоқталды. Әсіресе, жүкті әйелдер мен кішкентай балалары бар әйелдердің жағдайына баса назар аударды», – деді Президент.
Қасым-Жомарт Тоқаев еліміздегі қылмыстық-атқару жүйесінің басты мақсаты сотталған азаматтарды жазалау емес, түзету болуы керек екенімен келісетінін айтты.
«Ер адам немесе әйел болсын, бас бостандығынан айырылғандардың бәрі заң алдында бірдей екені түсінікті», – деп атап өтті ол.
Алайда, Мемлекет басшысы адамгершілік құндылықтарды басшылыққа ала отырып, «Заң мен тәртіп» қағидатын сақтай отырып, кәмелетке толмаған баласы бар әйелдерге қатысты кейбір заңдық ұстанымдарды қайта қарауға болатынын айтты.
«Құқық қорғау органдары мен депутаттар осы мәселені байыпты әрі жан-жақты зерттеп, шешім қабылдау үшін ұсыныстар енгізуі керек», – деді Қасым-Жомарт Тоқаев.