Қазақстан Президенті Қасым-Жомарт Тоқаев Қазақстан халқы Ассамблеясының ХХХІV сессиясының пленарлық отырысында сөйлеген сөзінде ел тарихында елеусіз қалған жергілікті батырларды ұлықтау мақсатында маңызды шешім қабылданғанын мәлімдеді. Бұл туралы Aqshamnews.kz сайты хабарлайды.
Мемлекет басшысының тапсырмасымен Республикалық ономастикалық комиссия 500-ден астам көшеге бұған дейін көпшілікке кеңінен танылмаған, алайда ел үшін ерен еңбек еткен азаматтардың есімін беру туралы шешім қабылдады.
"Бірер күн бұрын менің тапсырмаммен Республикалық ономастикалық комиссия елді мекендердегі 500-ден астам көшеге бұған дейін елеусіз қалған жергілікті қаһармандардың есімін беру туралы шешім қабылдады", – деді Тоқаев.
Президенттің айтуынша, бұл бастама – тарихи әділеттілікті қалпына келтіру жолындағы нақты әрі символдық мәні зор қадам.
Мемлекет басшысы бұл шешімнің әсіресе Ұлы Жеңістің 80 жылдығын атап өтер қарсаңда қабылдануының маңыздылығына тоқталды. Жаңа атаулар ең алдымен соғыс ардагерлері мен ел үшін еңбек еткен тұлғаларға арналады.
"Бұл шешім – Ұлы Жеңісті, оған қатысушыларды қаншалықты қадір тұтатынымызды көрсететін маңызды қадам", – деді Президент.
Ол жаңа көшелерге немесе бұрын атауы қайталанып келген көшелерге жергілікті батырлардың, ұлтқа еңбек сіңірген тұлғалардың есімі берілетінін нақтылады.
Қасым-Жомарт Тоқаев ел тарихына есімі алтын әріппен жазылуға лайық, бірақ әртүрлі себеппен ұмыт қалған тұлғаларды дәріптеу – ұлттың болашағы үшін аса маңызды екенін атап өтті. Бұл қадам жастардың тарихи санасын қалыптастырып, отансүйгіштікке тәрбиелеуде де үлкен рөл атқарады.
500-ден астам көшеге жергілікті қаһармандардың есімін беру туралы шешім – Қазақстанның тарихи жадыны жаңғырту жолындағы нақты қадамы. Бұл – Ұлы Жеңіске, ұлттық бірлікке және елге адал қызмет еткен азаматтарға көрсетілген шынайы құрмет. Енді бұл көшелер жас ұрпақ үшін ерлік пен еңбекке бастар символға айналмақ.