Өңірлік коммуникациялар қызметінің алаңында халықтың қаржылық сауаттылығын арттыруға бағытталған «Қарызсыз қоғам» жобасының қорытындысы жарияланды, деп хабарлайды aqshamnews.kz
Жоба 2024 жылдың 5 ақпанында басталып, 12 563 қатысушыны қамтыды. Бұл бастапқыда жоспарланған 12 000 адамнан асып түсті. Жобаны Алматы әкімдігі мен Қаржы нарығын реттеу және дамыту агенттігінің қолдауымен «AMANAT» партиясы жүзеге асырды.
Брифинг барысында Жұмыспен қамту және әлеуметтік бағдарламалар басқармасының басшысы Бауыржан Жаубасов жобаның басты көрсеткіштерімен бөлісті. Оның айтуынша, қатысушылардың 22,9%-ы көпбалалы отбасылар болса, 74,3%-ының несиелері бар. Сонымен қатар, қатысушылардың 13,8%-ы төлемдерін 90 күннен астам уақыт кешіктірген.
«Жобаның мақсаты — халықтың қаржылық сауаттылығын арттыру. Бұл жеке қаржыны басқару, шығындарды оңтайландыру, несиелер мен қарыздар бойынша кеңестер, сондай-ақ жұмысқа орналасу жөніндегі жеке консультацияларды қамтиды. Оқыту Алматының сегіз ауданында міндетті бағдарламалар мен сарапшылардың кеңестері арқылы жүзеге асырылды», — деді Б. Жаубасов.
Оқу бағдарламасының нәтижесінде 5708 қатысушы түрлі қызмет түрлерін пайдаланды:
- жеке бюджетті құру (2814 адам);
- қарыздар мен банкроттық бойынша заң көмегі (627 адам);
- жеңілдетілген несиелендіруге және гранттарға құжаттар дайындау (298 адам);
- несиені қайта қаржыландыру (207 адам);
- несиені ішінара немесе мерзімінен бұрын өтеу бойынша кеңестер (467 адам);
- грант пен несие алу үшін ЖК ашу (445 адам).
Сонымен қатар, мемлекеттік бағдарламаларға қатысу үшін 180 бизнес-жоспар дайындауға көмек көрсетілді.
Брифингке «AMANAT» партиясы Алматы қалалық филиалы төрағасының орынбасары Қуаныш Төлепов қатысты. Ол пилоттық кезең барысында еліміз бойынша 65 мыңнан астам адамның оқудан өткенін атап өтті.
«Қазіргі заман талабы — әр адамның жеке қаржыны басқару негіздерін білуі. Бұл бюджетті тиімді жоспарлау үшін ғана емес, отбасы, қоғам және елдің әл-ауқатын арттыру үшін де маңызды», — деп атап өтті Қ. Төлепов.
«Қарызсыз қоғам» жобасы тиімді жүзеге асырылуда және Алматы тұрғындарының қаржылық сауаттылығын арттыруға үлкен үлес қосуда. Жоба халықтың барлық санаттарына жеке қаржыны басқару дағдыларын қалыптастыру арқылы 2026 жылға дейін жалғасатын болады.