Халықтың 85 пайызы бір рет болса да онлайн шағын несие алған. Негізі бұл күлетін жағдай емес. Демек, халық қарызға өмір сүреді. Осы күні онлайн кредит алу оңай, ал қайтару қиын. Сондықтан билік «қаржы ұйымдары экономиканы емес, тұтынушыларды несиелеуге мойын бұрып кетті» деп айыптауда, деп хабарлайды аlmaty-akshamy.kz.
«Қазақстан ФинТех қауымдастығы» заңды тұлғалар бірлестігі қазақстандықтар арасында онлайн микрокредиттердің маңызы туралы сауалнама (онлайн) жүргізген.
Сауалнамаға 472 респондент қатысты. Нәтижесінде қазақстандықтардың басым көпшілігі кем дегенде бір рет онлайн шағын несие алғаны (85%) белгілі болды. Отандастарымыздың үштен бір бөлігінің түгелге жуығы онлайн шағын несиеге (31%) жүгінеді. Жауап бергендердің 39%-ы жеке тұрмыстық қажеттілігін онлайн шағын несие арқылы шешетінін жазған: яғни, алған қарызды тауар сатып алуға, коммуналдық қызметтерді төлеуге, жедел медициналық қызмет көрсетуге, жалға алу немесе үй жөндеуге жұмсайды. Сонымен қатар, қазақстандық ФинТех қауымдастығының мәліметтері бойынша, онлайн-микронесие тұтынушыларының 50%-ы өзін-өзі жұмыспен қамтыған Қазақстан азаматтары. Ел экономикасының түрлі салаларында 9,1 млн адам жұмыспен қамтылған. Оның ішінде 6,9 млн адам жалдамалы жұмысқа тартылғандар (экономикадағы жұмыспен қамтылғандардың жалпы санының 76%-ы). 2,2 млн адам өзін-өзі жұмыспен қамтығандар (жалпы санының 24%-ы).