Марқұм Шерзат Полаттың әкесінің үстінен қылмыстық іс қозғалды, деп хабарлайды aqshamnews.kz.
Алматы облысының Полиция департаменті 10 желтоқсан күні ұсталған Қаржаубай Нұрымовтың үстінен бөтеннің мүлкін қасақана бүлдіру фактісі бойынша қылмыстық іс қозғалғанын хабарлады.
Полиция мәліметінше, 10 желтоқсанда Еңбекшіқазақ ауданының Азат ауылында болған жерлеу рәсімі кезінде автокөлік иесіне материалдық залал келтірілген.
- Бұл әкімшілік жауапкершілік шегінен едәуір асып, іс-әрекеттің қылмыстық саралануына әкеп соғады. Қазіргі уақытта оқиғаның барлық мән-жайды анықтау мақсатында жан-жақты, толық және объективті тергеу жүргізіліп жатыр, - деп хабарлады департаменттен.
Ол екі жылға дейін бас бостандығынан айырылуы мүмкін.
Айта кететіні, Қылмыстық кодекстің 202-бабы бойынша қылмыстық іс жүргізілген жағдайда айыпталушы:
- бес жүзден екі мың АЕК-ке дейінгі мөлшерде айыппұл төлеуге;
- не сол мөлшерде түзету жұмыстарына, не үш жүзден алты жүз сағатқа дейінгі мерзімге қоғамдық жұмыстарға тартуға;
- не екі жылға дейінгі мерзімге бас бостандығын шектеуге не сол мерзімге бас бостандығынан айыруға жазаланады.
Еске салайық, бұған дейін сот шешімімен Қаржаубай Нұрымов 15 тәулікке қамалған болатын.