Алайда апелляция алқасы санкцияны өзгеріссіз қалдырды
Қарағандыда 30 метр биіктіктен секіріп, мерт болған 33 жастағы әйелдің өліміне кінәлі деп айыпталып отырған аттракцион нұсқаушысы аппеляцияға өтініш берді. Ол тергеу аяқталғанға дейін бұлтартпау шарасын үй қамағына ауыстыруды өтінді. Алайда апелляция алқасы санкцияны өзгеріссіз қалдырды, деп хабарлайды Almaty-akshamy.kz ҚазАқпарат агенттігіне сілтеме жасап.
Қарағандыда әйел өліміне әкеп соққан роуд-джампинг аттракционының 32 жастағы нұсқаушысына тергеу кезінде «қамауда ұстау» санкциясы бекітілген болатын.
Айыпталушы сот алқасынан аталмыш шешімді қайта қарап, үй қамағына немесе ешқайда кетпеу туралы қолхат алу ретінде жеңілдетуді сұрады.
Алайда апелляция алқасы санкцияны өзгеріссіз қалдырды.
«Қарағанды тергеу сотының «қамауда ұстау» бұлтартпау шарасын таңдау туралы қаулысы өзгеріссіз қалды. Апелляциялық шағым қанағаттандырылмайды», – деп мәлімдеді облыстық сот.
Ұсталған азамат тергеу аяқталғанға дейін тергеу изоляторында болады. Іс Қылмыстық кодекстің 306-бабы «Адам өліміне әкеп соққан, қауіпсіздік талаптарына сай келмейтін қызметтер көрсету» бойынша тергеледі.
Сот-медициналық сараптама, сот-наркологиялық, сот-психиатриялық сараптама тағайындалды.
Естеріңізге сала кетейік, 10 қазанда 33 жастағы әйел «Созвездие» қонақ үйінің төбесінен секіріп, жердегі бетон құрылысқа соғылған болатын. Әйел алған жарақаттарынан көз жұмды. Бір күннен кейін тергеуші нұсқаушыны қамауға алды, себебі қонақ үйдің сыртқы бейнекамерасының кадрларында аттракционның белбеуі дұрыс бекітілмегені байқалды.
13 қазанда сот күдіктіге «қамауда ұстау» санкциясын қолдану туралы шешім қабылдады.