Сот үкімі заңды күшіне енген жоқ.
Олар сот алдында изоляторға қамалған "күдіктіні" өлтіріп қойғаны үшін жауап берді деп хабарлайды Almaty-akshamy.kz
Талдықорған қалалық сотының баспасөз қызметі хабарлағандай, Қаңтар оқиғасында изоляторға қамалған "күдіктіні" өлтіріп алған полицей 10 жылға сотталды, ал оның осы фактіні жасырған әріптесі 4 жылға бас бостандығынан айырылды.
Анықталғандай, 2022 жылдың 8 қаңтарында полиция басқармасының қызметкерлері "жаппай тәртіпсіздіктерге қатысқан" деген күдікпен жәбірленуші М.-ны уақытша ұстау изоляторына (УҰИ) жеткізген. УҰИ ғимаратында өзінің қызметтік міндеттерін атқарған сотталушы Б. жәбірленушіге жарақат келтіріп, ол ауруханада қайтыс болған. Екінші сотталушы С. осы ауыр қылмыс фактісін жасырған.
Сотталушы Б. кінәсін мойындамады, соттан өзін ақтауды сұрады. С. кінәсін мойындап, өкінді.
"Айыпталушылардың кінәсі іс бойынша жиналған дәлелдемелермен, куәгерлердің айғақтарымен, сот сараптамаларының қорытындыларымен дәлелденді. Сот үкімімен Б. ҚК-нің 146-бабының 3-бөлігі бойынша кінәлі деп танылды және оған 10 жыл мерзімге бас бостандығынан айыру жазасы тағайындалды. С.-ға ҚК-нің 432-бабы бойынша 4 жыл мерзімге бас бостандығын шектеу жазасы тағайындалды", - делінген Жетісу облыстық соты баспасөз қызметінің хабарламасында.
Сондай-ақ, сотталғандардан жәбірленушілердің пайдасына 15 млн теңге сомасында моральдық зиян өндірілді.