Қазір дүрбелеңге қатысты деген 25 адамның ісі сотта қаралып жатыр
«Қаңтар оқиғасына» байланысты қабылданған «Рақымшылық» туралы заңның аясында Алматыда 156 адамға амнистия шарасы қолданылды, Оның ішіндегі 4 азаматқа рақымшылық сотқа дейінгі тергеу кезінде көрсетілген. Бұл туралы қалалық прокуратура мәлімдеді, деп хабарлайды Almaty-akshamy.kz Almaty.tv-ге сілтеме жасап.
Құзырлы орган тиісті соттарға пробация бағыты бойынша жазаны қысқарту немесе толық босату туралы орта және ауыр қылмыс жасаған 181 адамға қатысты ұсыныс жолдаған. 152 іс қаралып, шешім шыққан. Соған сәйкес 152 адамның біреуі қамаудан босатылса, қалғанының жазасын өтеу мерзімі қырқартылыпты.
«Амнистия қолданылғаннан кейін орташа ауыр қылмыс жасағандар жазадан босталады. Ал ауыр қылмыспен айып талғандардың тек жазасын өтеу мерзімі қысқарады. Бұл рақымшылық тұлғаларды ақтамайды, тек мемлекеттік бір реттік кешірім актісі», – деді қала прокурорының орынбасары Назарбай Ыбраймолдаев.
Қазір дүрбелеңге қатысты деген 25 адамның ісі сотта қаралып жатыр. 15 жанға амнистия шарасы қолданылуы мүмкін. Ал бейберекетті ұйымдастырғандарға рақымшылық жасалмайды. Сондай-ақ жаңарған Конституциялық заңға сәйкес Бас прокурорға Конституциялық сот пен Жоғарғы сотқа жүгіну құқығы берілді. Соның аясында енді прокурорлар сот тәжірибесі, қылмыстық, азаматтық істер бойынша соттан түсініктеме алуға құқылы әрі сот актілерін тоқтата алады.
«Бұдан бөлек прокурорлардың тексеріс жүргізуіне керекті негіздемелердің шеңбері кеңейді. Қазір прокуратура басшылары мемлекеттік органдарға ғана емес, физикалық ерекшеліктеріне байланысты өзін-өзі қорғай алмайтын тұлғалар мен кәмелетке толмағандардың құқығы бұзылса, шағын және орта кәсіп субъектілерінің құқығы бұзылса тексеріс тағайындай алады», – деді қала прокурорының аға көмекшісі Руслан Суханбердин.